ჯანსუღ ჩარკვიანი - დედის ჯერი

ვერ მოასწრებ ჩაის დასხმას...

ჩაიდანი მღერის -

ეს - მე,

ეს - შენ,

ეს - სხვას

და სხვას,

დედას - არაფერი.

სიხარულის მოდის თავსხმა,

წვიმასავით ბევრი -

ეს - მე,

ეს - შენ,

ეს - სხვას

და სხვას,

დედას - არაფერი.

პირჯვარს დასწერს დედა ფაცხას,

მაღლა იწევს ჭერი,

ეს - მე,

ეს - შენ,

ეს - სხვას

და სხვას,

დედას - არაფერი.

ბოლოს, საქმე მოგვარდება

მოყვარისა და მტერის,

სიკვდილი რომ მოგვარდება 

დგება დედის ჯერი.