ჩემი ქვეყნის ოქროყანავ, დიდი გარჯით მოწეულო, სიწითლისგან დაბრაწულო, კანდამსკდარო ბროწეულო, ნაცრისფერი ღრუბლის ძნებო, ფიჭვის ტევრში გარეულო, მეგობრებო, მეზობლებო, შინაურო, გარეულო, ხვავიანო პურის ყანავ, გლეხის ხელით დაწერილო, ხვამლის მთაზე გადასულო თეთრო ნისლო აფრიანო, შენი თეთრი ბაირაღი სანამ უნდა აფრიალო?! თავთავებით ოქროსფერად მოსირმულო მთავ ფრიალო, მთებო, მთებო, რუხო მთებო, ნისლების თავსაფრიანნო, ზვარო, ზვარო ჯიშიანო, ოჯალეშის ჯიშის ზვარო, ფიჭვის ტყეო, ფიჭვის ტყეო, ნისლები რომ იტვირთეო, ნისლის ნამში განბანილო მთაო გულმკერდგადაშლილო, მთის გულ-მკერდში დამალულო ოქრო, ვერცხლო, ქვანახშირო, და მამულის სიყვარულო, ხალხის გულში დანერგულო; მშობლიურო მინდორ-ველო, სიცოცხლეო საამურო, მწვერვალებზე ანამღერო მწყემსი ბიჭის სალამურო, და ბულბულო ხმაწკრიალავ, ბუჩქნარებში განაბულო, თვითმფრინავო ცაში ლაღო, მთებთან ახლო მოფრენილო, ქვევით ქვეყნის ედემ-ბაღო, ია-ვარდით მოფენილო, მიწის მკერდზე გაფანტულო ღელეებო, წყაროებო, შემოდგომავ შემოქმედო, შემოდგომავ მადიანო, მტერმა გნახოს, შემოგხედოს, გული დაუდარდიანო! ამდენი ხნის დანაპირო - გოგონავ შავთვალიანო, აქოჩრილო რთხმელის ტყეო, ბარდებო და იელებო, მეგობრებო, მეზობლებო, ახოვანო ჯეელებო, იძლიეროს მისმა მაჯამ, ვინც დაგთესა, მოგიყვანა! ჭირნახულით დატვირთულო ბეღლებო და ნალიებო, გამრჯელისთვის გატენილო, უქნარასთვის ცარიელო, სამხრეთისკენ გაფრენილო ყელმოღერა წეროებო, მეგობრებო, მეზობლებო, შინაურო, გარეულო, ნაცრისფერო ღრუბლის ძნებო, ფიჭვის ტევრში გარეულო, ახოვანო ვაჟკაცებო, უშიშარო ჯეელებო, კოლხელებო, ქართლელებო, კახელებო, მთიელებო, - თქვენთვისა მაქვს გულის კარი სასიმღეროდ გაღებული, მინდა ლექსით გესაუბროთ, დაგირხიოთ ხმა სალხენო და ქართველი მგოსნის ჩანგი ამ სიმღერით ვასახელო! |
პოეზიის გვერდი • • • • • • ლადო ასათიანის პოეზია |