ჯანსუღ ჩარკვიანი - მოფრთხილება უნდა

საქართველოს ტყეს,

ხოხობსა და მწყერს,

საქართველოს ველს,

ირემსა და შველს -

ყოველდღე და მუდამ

მოფრთხილება უნდა.

ულამაზეს კუთხის

მკვიდრი გახლავთ შურთხი,

მოგოგმანებს კაკაბი

ცისარტყელას ცხრა კაბით...

სანამ კიდევ რიხით

დაბრძანდება ჯიხვი,

სანამ კიდევ დარჩა

დურაჯი და არჩვი,

სანამ ერთი-ორი

დაგოგმანებს გნოლი,

სანამ მწვანე არის

ჩვენი ხე და მოლი -

დედა საქართველოს,

ტყეს, მთასა და მდელოს,

ყოველდღე და მუდამ

მოფრთხილება უნდა.