თამარ ფხაკაძე - ანა-გოგოს წერილი

საყვარელო თოვლის პაპა,

ჩემს ნატვრასაც გეტყვი, აბა.

საახალწლოდ მომიტანე

ფუშფუშებიანი კაბა!

ზედ ეხატოს

მზე და მთვარე.

ვარსკვლავებიც

ჰქონდეს, ბარემ!

რომ ჩამოჰკრავს თორმეტჯერ,

საახალწლოდ საათი,

შენც მოქროლდი მარხილით!

არ იარო ტაატით!

ვერცხლის ზანზალაკები

მალე მომიწკარუნე!

დაგახვედრებ გოზინაყს,

პირი ჩაიტკბარუნე.

გელოდები,

იცი, როგორ?

აბა, გკოცნი.

ანა-გოგო.