ოთარ ჭელიძე - აჰა, უკვე აპრილდება...

აჰა, უკვე აპრილდება,

თქორი ცერად ცრის; 

ლამაზია ატირება 

გაზაფხულის ცის.

მზე პირს იბანს და წყურვილი 

გახრჩობს მთელი დღის,

ცისარტყელას ნაწურივით 

თვალზე ცრემლი გდის.

რა გაღონებს? აპრილდება, 

კვირტი პენტავს ფიფქს, 

გირჩევნია ატირება 

მაგ საზარელ ფიქრს.

მღვრიე თვალებს რას აცეცებ? 

რას აპირებ? სდექ! 

თავად მოვა, რასაც ეძებ, 

ხვალ თუ არა - ზეგ.

პოეზიის გვერდი   • • •     • • •   ოთარ ჭელიძის პოეზია