თხრობითი წინადადება

თხრობითია წინადადება, რომლითაც მთქმელი რაიმე აზრს გადასცემს, მოუთხრობს.

"გაზაფხულდა. ბუჩქის ძირას თავს იწონებს ნაზი ია.

ჩვენს სალხენად კოკობ ვარდსაც ეშხით გული გაუღია. (წერ.).

აქ სამი თხრობითი წინადადებაა:

პირველი - ერთი სიტყვით არის გადმოცემული - (გაზაფხულდა);

მეორე - ექვსით (ბუჩქის ძირას თავს იწონებს ნაზი ია);

მესამე - შვიდით (ჩვენს სალხენად კოკობ ვარდსაც ეშხით გული გაუღია.)

ლაპარაკისა და დაწერილის ხმამაღლა კითხვისას თხრობითი წინადადების ბოლოს ხმას ვუდაბლებთ და ვჩერდებით.

წერის დროს თხრობითი წინადადების ბოლოს წერტილს ვწერთ.

სავარჯიშო 1. გადაიწერეთ ნაწყვეტი, გამოარკვიეთ, რამდენი თხრობითი წინადადებაა შიგ და ყოველი წინადადების ბოლოს დასვით წერტილი.

აღნიშნეთ რამდენ-რამდენი სიტყვისგან შედგება თითეული წინადადება.

დეკემბრის უკანასკნელი დღეა გარეთ საშინელი სიცივეა გრიგალი ღრიალებს და გლეჯს არემარეს მთები ხვივიან კლდეებიდან საზარელი გრიალი ისმის ხევხუვი სავსე იყო თოვლით ნამქერი ტრიალებდა ჰაერში შიმშილით შეწუხებული მგლები ღმუოდნენ ღრუში შეხიზნული ბუ მწარედ გაჰკიოდა ყველა შეძრწუნებული და შეწუხებული იყო  (რაზ.).

სავარჯიშო 2.

ა) რომელიმე მოთხრობიდან ამოიწერეთ ხუთი თხრობითი წინადადება;

ბ) თხრობითი წინადადებებისგან შეადგინეთ პატარა ამბავი, სათაური გაუკეთეთ და ჩაწერეთ რვეულში.