ბესიკ ხარანაული - სულ ერთ წუთს...

სულ ერთ წუთს სევდა მოგვეძალება

და გვეჩვენება,

რომ აქამდის ჩვენი ცხოვრება

ტანჯვა იყო და შემდეგშიც,

რა თქმა უნდა, ტანჯვა იქნება.

მაგრამ მალევე,

ბუნებრივად და თავისთავად,

მხიარულება მოგვიცავს ხოლმე

და ჩვენ გვგონია,

რომ აქამდის რაც გვიცხოვრია,

სულ ლხინი იყო და მომავალშიც,

რა თქმა უნდა,

ლხინი იქნება.

ახლა ხომ აღარ გაგიკვირდებათ,

რომ შევძახო: - „რა დაგიშავეთ,

ღმერთო, მითხარი!"