ნიკო გომელაური - ხმელეთი იყო სადღაც...

ხმელეთი იყო სადღაც,

ზუსტად მახსოვს, რომ იყო...

შენ იწყებ ახალ აბზაცს,

ჩემო პრანჭია ნიკო:

- ხმელეთს ეძებდი მუდამ,

ტალღებმა, ეს რა გიყო?!

ჯიბეში მხოლოდ ხურდამ,

რად შეგაშინა ნიკო?..

ხმელეთი გინდა ახლოს,

გსურს, რომ არ გაირიყო:

ხელი არავინ გახლოს.

- ასე არ ხდება, ნიკო...

ვუსმენ ამ ხმებს და ვხმები,

ეს, მათ სინდისზე იყოს,

ხმელეთს ეძებდნენ სხვები

და აბრალებდნენ ნიკოს...