ოთარ ჭილაძე - დღესაც გრძელდება, დღესაც ასეა...

დღესაც გრძელდება, დღესაც ასეა:

ქარი, სიჩუმე და ფოთოლცვენა...

და მე ვგრძნობ, როგორ მიცვლის ხასიათს

ქარი, სიჩუმე და ფოთოლცვენა...

მე, შეიძლება, დღეს დამეწერა

ის, რაც მაწვალებს გაჩენის დღიდან,

მაგრამ ჩემს თვალწინ მოტყდა კენწერო,

რომელსაც გუშინ ქარი ვერ ხრიდა.

და ისევ ქუჩას ვუბრუნებ თვალებს,

თითქოს მდინარეს ვუბრუნებ თევზებს,

და ვიცდი, რადგან ვიცი, რომ მალე

ამტკივდებიან ფიქრები შენზე.

დღესაც ასეა, დღესაც ასეა:

ქარი, სიჩუმე და ფოთოლცვენა...

და მე ვგრძნობ, როგორ მიცვლის ხასიათს

ქარი, სიჩუმე და ფოთოლცვენა...