კერაში ცეცხლი გუზგუზებს, ციმცირებს ალი ალზედა; გარშემო სხედან ბავშვები, ძილი არ მოსდით თვალზედა. მოაქვს ხაჭო და ყველია; ქოთნით რძე შესადედებლად, შავ ძროხის მონაწველია. მას თაფლი მოაქვს გობითა, ვით ქარვა, ისე ბრწყინავენ ფიჭები გარეგნობითა. ვაშლები, ბროწეულია, ჩურჩხელა, ტკბილი კვერები და მსხალი მოწეულია. ჩიჩილაკებს თლის ბაბუა; ტკბილად უმზერენ ბავშვები სუყველა კისერ-ღაბუა. ნეტავი რაღა სწადია? ესეც გრძნობს ალბათ, რომ ხვალე ახალი წელიწადია... დაწექით, გენაცვალეთო, ამდენ ხანს ჯდომა-მზერითა განა არ დაიღალეთო?! დალაგდით, დაიძინეთო, დილაზე ადრე ადექით და ტკბილად მოილხინეთო. |