მუხრან მაჭავარიანი - ქალები ქალაქისანი

ქალები?! განსაკუთრებით

ქალები ქალაქისანი!

მე მოვკვდე,თუ არ მერჩივნოს

ტირიფნი არაგვისანი!

ყალბია მათი სიცილი,

ცრემლიც კი მათი ყალბია...

გიღალატებენ ისინი

არ ენდო წითელ კაბიანს.

ტირიფნი? განსაკუთრებით

ტირიფნი არაგვისანი,

ესენი შენ არ გეგონოს

ქალები ქალაქისანი!

წრფელია მათი შრიალი,

მათი ქვითინიც წრფელია...

ტირიფზე ნამუსიანი

ამ ქვეყნად არაფერია.