ჯერ კიდევ წარსული დროიდან ღვინის ხარისხიანობას განსაზღვრავდნენ დეგუსტაციით (ლათინური სიტყვაა და ნიშნავს გემოს გასინჯვას). ქიმიური ანალიზით შეიძლება გაირკვეს ამა თუ იმ ღვინის კომპონენტები, მათი რაოდენობრივი შემცველობა, მაგრამ ის არ მიგვანიშნებს და არც ხსნის მათ შორის რომელია ღვინის ხარისხისათვის გადამწყვეტი, რის მიხედვითაც შეიძლება განისაზღვროს ამ ღვინის სირბილე სურნელი, ფერი, გამჭვირვალება, გემო, ასაკი...

ღვინის ამ თვისებების ამოხსნა და გაგება შესაძლებელია მხოლოდ ენით, ღვინის დაჭაშნიკებით. ღვინოების დეგუსტირებისას აუცილებლად წარმოდგენილი უნდა იქნეს საღი, სუფთა ღვინოები. კონგრესებსა და კონკურსებზე ღვინოებს, ჩვეულებრივ, აფასებენ საუზმემდე ან სადილამდე. ყველაზე უფრო მიღებულია ღვინის დეგუსტაცია დილით, უზმოზე.