ვახტანგ ჯავახაძე - წადი, ნახე...

წადი,

ნახე,

სახელმწიფო მუზეუმის სეიფი,

ნახე

მინის გალიებში

დამწყვდეული მზეები:

გაძარცვული გვირგვინები,

გაქურდული ხატები,

ცეცხლისფერი,

სისხლისფერი,

წლების ჩანახატები.

სული აღარ შეარჩინეს

მეფეებს და პოეტებს,

წადი ახლა

და ედავე

ლუვრს და მეტროპოლიტენს...

წადი,

ნახე

საქართველოს სახელმწიფო სეიფი,

წადი,

ხახულს ესაუბრე,

ზარზმას ემუსაიფე.

წადი,

თავი დაანებე

ზღაპრებსა და არაკებს,

წადი,

წადი,

ნახე და

მერე მელაპარაკე.