წერილის გაგზავნა!
თემატიკა
ქალბატონებს მამაკაცებს ბავშვთა სამყარო ლიტერატურა ჯანმრთელობა ფსიქოლოგია სექსი ბიზნესი ეტიკეტი რელიგია შეუცნობელი ავტო+ მოდა ენციკლოპედიები საიტის შესახებ
 
 
 
 

 

ფული ინტერნეტით

 

ვებ კატალოგი

 
  ნანახია 7395 - ჯერ |  
შრიფტის ზომა

 

 

 

რა არის ჰერპესი

რა არის ჰერპესიჰერპესი ფართოდ გავრცელებული კანისა და ლორწოვანს გარსის ვირუსული ინფექციაა.

ჯანდაცვის მსოფლიო ორგანიზაციის მონაცემებით მოსახლეობის 80%-ზე მეტი ამ ვირუსის პოტენციური მატარებელია.

არსებობს სხვადასხვა ტიპის ჰერპესის ვირუსი: 

მარტივი ჰერპესის ვირუსი 1 ტიპის (HSV-1 ლაბიალური ჰერპესი) 

მარტივი ჰერპესის ვირუსი 2 ტიპის ( HSV-2 გენიტალური ჰერპესი)

ჩუტყვავილას, ზოსტერის ვირუსი (Herpes Zoster)

ციტომეგალოვირუსი (CMV)

ეპშეინ-ბარის ვირუსი (EBV)

ადამიანის ჰერპესვირუსი მე-6 ტიპის.

ადამიანის ჰერპესვირუსი მე-7 ტიპის.

ადამიანის ჰერპესვირუსი მე-8 ტიპის.

და ა.შ

ძირითადად გავრცელებულია ორი ტიპის: - 1 ტიპის მარტივი ჰერპესი (HSV-1 ) და 2 ტიპის მარტივი ჰერპესი (HSV-2).

პირველი ტიპის (HSV-1 ) ვირუსი აზიანებს სხეულს წელამდე, ხოლო მეორე ტიპის – წელს ქვემოთ. 

გენიტალური ჰერპესი 2 ტიპის მარტივი ჰერპესი (HSV-2) ვერაგი დაავადებაა, სამწუხაროდ, მისი სრულად განკურნება შეუძლებელია და თანამედროვე მედიცინა ჯერ-ჯერობით უძლურია მთლიანად აღმოფხვრას ვირუსი ორგანიზმში.

თუმცა, ეს არ ნიშნავს, რომ ჰერპესის ეფექტურად მკურნალობა არ შეიძლება. დროული და გონივრულად შერჩეული მკურნალობის კურსი ხელს უწყობს ჰერპესული წყლულების სწრაფ შეხორცებას, ამცირებს დაავადების რეციდივების შესაძლებლობას, რის შედეგადაც შესაძლებელია მიღწეული იქნას ხანგრძლივი რემისია.

ჰერპესი ძალიან მგრძნობიარე თემაა, ამიტომ აუცილებელი კვალიფიციური კონსულტაცია პროფესიონალ სპეციალისტთან, რათა დაისვას ზუსტი დიაგნოზი და მოძებნილი იქნას პრობლემის აღმოფხვრის ეფექტური გზები.

ამავდროულად, აუცილებელია თავადაც გათვითცნობიერებული იყოთ და ყველაფერი იცოდეთ ჰერპესის შესახებ. ამიტომ, შეეცადეთ რაც შეიძლება მეტი გაიგოთ ამ დაავადებასთან დაკავშირებით.

 

გენიტალური ჰერპესის სიმპტომები

 

გენიტალური ჰერპესის სიმპტომებიგენიტალური ჰერპესის ყველაზე ფართოდ გავრცელებული სიმპტომებია: აუხსნელი ტკივილები, ჩხვლეტები, ქავილი და უსიამოვნო შეგრძნებები გენიტალიის მიდამოებში.

შემდგომ ამას მოჰყვება კანის გაწითლება მცირე ზომის სითხით სავსე ბუშტუკებიანი გამონაყარი:

» პაპულეზური (ერთეულოვანი)

» ვეზიკულარული (გავრცელებული)

ამ გამონაყარმა შესაძლოა თავი იჩინოს სხეულის სხვადასხვა მონაკვეთებზე:

ქალებშიც და კაცებშიც:

დუნდულებზე; ანუსში; პირის ღრუში;

ქალებში:

ვაგინის მიდამოებში; გარე გენიტალიებზე; ბოქვენზე, საშვილოსნოს ყელზე, ნაკლებად შორისზე და თეძოებზე.

კაცებში:

პენისისი თავზე, კანზე, ჩუჩაზე, სათესლე პარკზე, ბარძაყებზე,  შარდსადენში, შეიძლება გავრცელდეს შარდის ბუშტზეც;

ძალიან ხშირად, გამონაყარს თან ახლავს ქავილი (შესაძლოა არც ახლდეს) და მწვავე ტკივილი (უფრო ხშირად).

უმეტესწილად, ბუშტუკები გარკვეული დროის შემდეგ სკდება, მასში არსებული შიგთავსი გამოდის გარეთ, კანზე კი რჩება მცირე ზომის წყლულები (ზოგჯერ ხდება წყლულების შეერთებაც) რომელიც ნელ-ნელა ხორცდება, იფარება ქერქით და ბოლოს შუშდება კიდეც. 

მთელს ამ პროცესს, კი ხშირად თან ახლავს ტკივილი და წვა.

ზოგჯერ, წყლულები დიდი ხნის განმავლობაში არ ხორცდება და ადგილი აქვს კანის ეროზიას, ხოლო შეხორცების შემდეგ კანზე რჩება მცირე ზომის შრამები ან ნაწიბურები.

შეიძლება ბუშტულოვანი გამონაყარი არ იყოს მრავალრიცხოვანი და კანზე გაჩნდეს ერთი ან ორი ბუშტულა (პაპულეზური).

ჰერპესს შესაძლოა თან ახლდეს ცხელება, ტემპერატურის მატება, საზარდულის ლიმფური კვანძების შეშუპება და გადიდება (არა ყოველთვის).

ზოგჯერ ჰერპესის დროს ადგილი აქვს ტკივილის შეგრძნებას შარდვის დროს.

შესაძლებელია ჰერპესი იყოს აქტიური, მაგრამ იგი მიმდინარეობდეს ყოველგვარი სიმპტომების გარეშე, თუმცა ეს არ ნიშნავს, რომ ზომების მიღება და მისი არააქტიურ მდგომარეობაში გადაყვანა არ არის საჭირო.

მიუხედავად იმისა, რომ როგორც წესი, ჰერპესი აზიანებს სასქესო ორგანოების არეს, შესაძლოა იგი გამოვლინდეს სხვა ადგილებშიც - სახე, მკერდი, ზურგი, მუცელი და ფეხები.

თუ თქვენ შეამჩნიეთ, რომელიმე ამ სიმპტომთაგანი და ეჭვობთ, რომ შესაძლოა გაქვთ გენიტალური ჰერპესი, ნუ ჩავარდებით პანიკაში და ნუ მიმართავთ თვითმკურნალობას (ვირუსოთერაპიას, იმუნოთერაპიას და გარეგან მკურნალობას).

მიმართეთ სპეციალისტს (ინფექციონისტს, დერმატო-ვენეროლოგს, იმუნოლოგს), რათა დასმული იქნას ზუსტი დიაგნოზი (არსებობს ბევრი დაავადება, რომლებიც სიმტომებით ძალიან წააგავს გენიტალურ ჰერპესს) და მიიღოთ მკურნალობის ეფექტური სქემა.

მკურნალობის სწორი კურსის მიზანი უნდა იყოს არა მხოლოდ ჰერპესის „დაძინება“, არამედ მის პროფილაქტიკა და რეციდივებს შორის პერიოდის მაქსიმალური გაზრდა (რემისია).

 

გენიტალური ჰერპესის გამომწვევი მიზეზები და გავრცელების გზები

 

გენიტალური ჰერპესის გამომწვევი მიზეზები და გავრცელების გზებიგენიტალური ჰერპესი, ძირითადად ვრცელდება სექსუალური გზით და არატრადიციული სქესობრივი კავშირით.

ჰერპესის ვირუსი შესაძლოა გადაეცეს ახალშობილს დედისგან, მშობიარობის დროს.

იმ შემთხვევაში, თუ რომელიმე პარტნიორს გენიტალური ჰერპესი აქტიურ ფაზაში ქვს, საჭიროა სექსუალური კონტაქტებისგან თავის შეკავება, სანამ ვირუსი არ „დაიძინებს“.

აღსანიშავია, რომ ვირუსის გადაცემა შეიძლება მოხდეს იმ შემთხვევაშიც, როცა გამონაყარი არ აღინიშნება. ამ დროს, შეიძლება ჰერპესი მაინც იყოს გააქტიურებული, უბრალოდ იგი უსიმპტომოდ მიმდინარეობდეს, ამიტომ, პარტნიორის დაცვის მიზნით აუცილებელია პრეზერვატივის გამოყენება. 

ჰერპესის ვირუსი შეიძლება გავრცელდეს აირ-წვეთოვანი და კონტაქტური გზით (კოცნა ან დაზიანებულ ადგილებზე შეხება), ამიტომ აუცილებელია ჰერპესით დაავადებულ ადამიანმა მკაცრად დაიცვას ჰიგიენა და  ჰქონდეს მხოლოდ მისთვის განკუთვნილი ისეთი საყოფაცხოვრებო ნივთები როგორიცაა ჭიქა, თეფში, პირსახოცი და ა.შ, რათა აარიდოს ოჯახის წევრები ვირუსის გადადების რისკს.

ასევე საჭიროა გენიტალიებთან ყოველი შეხების შემდეგ ხელების საპნით საგულდაგულოდ დაბანა, რათა არ მოხდეს ინფექციის გავრცელება. არ შეიძლება მჭიდროდ შემოტმასნილი ტანსაცმელის ტარება. სასურველია მხოლოდ თავისუფალი, ბამბისგან დამზადებული საცვლების გამოყენება.

შესაძლებელია გენიტალური ვირუსით თვითდაინფიცირებაც, ანუ პირველი ტიპის (ტუჩის ჰერპესის) დროს, წყლულზე ხელით შეხება და შემდეგ დაუბანელი ხელით სასქესო ორგანოებზე, პირზე ან თვალზე მისი გადატანა.

ჰერპესის ხშირ რეციდივებს და მის გააქტიურებას  ხელს უწყობს გაციება, ფსიქიკური სტრესი, ფიზიკური გადაღლა და რაც მთავარია - იმუნიტეტის დაქვეითება.

იმუნიტეტის მუდმივი კონტროლი აუცილებელი პირობაა იმისთვის, რომ ჰერპესი არ გააქტიურდეს, რადგან როცა ორგანიზმი ჰკარგავს ბრძოლისუნარიანობას, ვირუსი მას ადვილად ერევა.

 

გენიტალური ჰერპესი და ორსულობა

 

გენიტალური ჰერპესი და ორსულობაარსებობს გავრცელებული მოსაზრება, რომ გენიტალური ჰერპესი იწვევს უშვილობას, თუმცა ეს არ შეესაბამება სინამდვილეს და უამრავი ფაქტია, რომ გენიტალური ჰერპესის შემთხვევაში დაბადებულა სრულიად ჯანმრთელი ახალშობილი.

მიუხედავად ამისა, საჭიროა უკიდურესი ყურადღების გამოჩენა ამ დაავადების დროს.

ჩვეულებრივ, ორსულობის დროს შეიძლება ჰერპესის მხოლოდ რეციდივი გამოვლინდეს. 

ფეხმძიმობის ადრეულ სტადიაში ჰერპესი შეიძლება თვითნებური აბორტის, უფრო იშვიათად კი ნაყოფის თანდაყოლილი ნაკლის გამომწვევი მიზეზი გახდეს.

უფრო გვიან სტადიაში მისმა გამოვლენამ კი შეიძლება ნაადრევი მშობიარობა და დღენაკლული ბავშვის დაბადება გამოიწვიოს.

არსებობს ყველა საფუძველი იმისა, რომ ბავშვი დაინფიცირდეს სამშობიარო გზების გავლის მომენტში. ამიტომ შეიძლება საკეისრო კვეთის დანიშვნა გახდეს აუცილებელი. სამწუხაროდ, სიკვდილიანობის მაჩვენებელი ჰერპესით დაავადებულ ახალშობილებს შორის 40-50% - ს შეადგენს.

ჰერპესი განსაკუთრებით საშიშია ფეხმძიმობის გვიან პერიოდში, მაგრამ ნებისმიერ შემთხვევაში აუცილებელია თავიდანვე იყოთ ფრთხილად და იმყოფებოდეთ ექიმის მუდმივი მეთვალყურეობის ქვეშ.

ჰერპესის შემთხვევაში იგი აუცილებლად დაგინიშნავთ ანტივირუსული პრეპარატებით მკურნალობას, რომელიც მიიღება შინაგანად და განსაკუთრებულად ეფექტური საშუალებაა ჰერპესის წინააღმდეგ.

აუცილებელია ექიმმა მუდმივად აკონტროლოს თქვენი და თქვენი მომავალი პატარას ჯანმრთელობა.

 

გენიტალური ჰერპესის მკურნალობა სამედიცინო მეთოდებით

 

გენიტალური ჰერპესის მკურნალობა სამედიცინო მეთოდებითგენიტალურ ჰერპესი კომპლექსურ მიდგომას საჭიროებს. ძირითადად მისი მკურნალობა ხდება შემდეგი მეთოდებით:

ანტივირუსული მკურნალობა;

ადგილობრივი საშუალებები;

იმუნოთერაპია;

 ვაქცინაცია (ეფექტურობა დადასტურებული არ არის);

ფიზიოთერაპია (ზოგჯერ);

 

ანტივირუსული მკურნალობა

 

როგორც ცნობილია ჰერპესი ვირუსული ინფექციაა. ამიტომ ანტივირუსული პრეპარატების გამოყენებას შეუძლია შეამციროს ჰერპესის შეტევისა და მიმდინარეობის ხანგრძლივობა.

დღესდღეობით, გენიტალური ჰერპესის სამკურნალოდ ძირითადად გამოიყენება ისეთი ანტივირუსული პრეპარატები, როგორიცაა:

»» აციკლოვირი (ზოვირაქსი და მისი ანალოგები);

»» ვალაციკლოვირი (ვალტრექსი);

»» ფამაციკლოვირი (ფამვირი);

»» პენციკლოვირი (დენავირი, ვექტავირი);

თუმცა რა თქმა უნდა არსებობს სხვა პრეპარატებიც, მათ შორის არის მაგალითად სულ ახლახან შემუშავებული პრეპარატი - პრიტელივირი (Pritelivir), რომელიც სხვა პრეპარატებისგან განსხვავებით ამცირებს მეორე ტიპის მარტივი ჰერპესის ვირუსის უსიმპტომო გამოვლინებას, ასევე სასქესო ორგანობის გაღიზიანებასა და ქავილის ხანგრძლივობას.

ძალიან მნიშვნელოვანია - თუ ანტივირუსულ მედიკამენტებს მიღებთ ჰერპესის შეტევამდე, ანუ უმალვე, როგორც კი იგრძნობთ რაიმე ტიპის წინა ჰერპესულ სიმპტომს - მაგალითად წვას, ქავილს ან უსიამოვნო შეგრძნებას, ანუ მანამდე, სანამ გამოვლინდება ჰერპესული გამონაყარი.

ამ შემთხვევაში არსებობს შესაძლებლობა (და ასე ხშირად ხდება), რომ ჰერპესმა თავი არ იჩინოს და საერთოდ არ გავრცელდეს.

თუ ჰერპესული გამონაყარი მაინც გამოვლინდა, ამ შემთხვევაში სპეციალისტი კლინიკურ სურათზე დაყრდნობით ნიშნავს ანტივირუსული მკურნალობის კურსს, ანუ ზემოთ ჩამოთვლილი პრეპარატებიდან რომელიმეს (აციკლოვირი ვალტრექსი ან ფამაციკლოვრი) გარეგან საშუალებებთან და შესაძლოა იმუნოთერაპიასთან ერთად.

დიდი მნიშვნელობა აქვს ანტივირუსული პრეპარატების სწორად შერჩეულ დოზებსა და მიღების ხანგრძლივობას. ეს ხანგრძლივობა და დოზები სხვადასხვა პრეპარატებისთვის და პაციენტებისთვის შეიძლება იყოს სხვადასხვა, მაგალითად:

»» აციკლოვირი - 5 აბი დღეში 7-14 დღის განმავლობაში;

»» ვალაციკლოვირი (ვალტრექსი) - 2 აბი დღეში 5-7 დღის განმავლობაში;

»» ფამაციკლოვირი (ფამვირი) – 2 აბი დღეში - 5 დღის განმავლობაში;

გაფრთხილება: ანტივირუსული თერაპიის საჭიროებას, ვირუსული პრეპარატის დასახელებას, დოზებს და მიღების ხანგრძლივობას განსაზღვრავს მხოლოდ სპეციალისტი და არავითარ შემთხვევაში არ მიიღოთ ეს გადაწყვეტილება დამოუკიდებლად, მის გარეშე.

თუ გენიტალური ჰერპესის რეციდივების როცხვი მაღალია და იგი პაციენტს აღენიშნება ძალიან ხშირად წლის განმავლობაში, ამ შემთხვევაში შესაძლოა ექიმმა მას დაუნიშნოს სუპრესიული თერაპია (მედიკამენტების მიღება ხანგრძლივი დროის განმავლობაში).

სუპრესიული თერაპია ძირითადად ინიშნება იმ შემთხვევაში, თუ პაციენტს აქვს ჰერპესის ხშირი რეციდივები (წელიწადში 6-ჯერ და ზემოთ). ხოლო მათ, ვისაც რეციდივი იშვიათად ემართებათ, ენიშნებათ მკურნალობა ეპიზოდურად, ანუ მაშინ, როცა ვირუსი თავს იჩენს.

სუპრესიული თერაპიიის კურსი სხვადასხვა ანტივირუსული პრეპარატისთვის სხვადასხვაა, მაგალითად

»» აციკლოვირი - 2 აბი დღეში 8-24 თვის განმავლობაში;

»» ვალაციკლოვირი (ვალტრექსი) - 1 აბი დღეში 8-24 თვის განმავლობაში;

»» ფამაციკლოვირი (ფამვირი) – 2 აბი დღეში - 8-24 თვის განმავლობაში;

სუპრესიულ თერაპიას აზრი აქვს, თუ იგი გრძელდება ზემოთ ჩამოთვლილი ვადების განმავლობაში. ბევრი პაციენტი წყვეტს მკურნალობას ერთი ან ორი თვის შემდეგ, შეამჩნევს რა, რომ მკურნალობას ამ ვადაში არ მოაქვს მისთვის სასურველი შედეგი. თუმცა ეს შეცდომაა.

შედეგი შეიძლება დადგეს არა ნაკლებ 8 თვის შემდეგ. სუპრესიული თერაპია პრაქტიკულად უსაფრთხოა, იმ შემთხვევის გარდა, თუ პაციენტს აღენიშნება თირკმლების უკმარისობა და ალერგია კონკრეტული პრეპარატის მიმართ.

გაფრთხილება: სუპრესიული თერაპიის საჭიროებას, ვირუსული პრეპარატის დასახელებას და დოზებს - განსაზღვრავს მხოლოდ სპეციალისტი და არავითარ შემთხვევაში არ მიიღოთ ეს გადაწყვეტილება დამოუკიდებლად, მის გარეშე.

საყურადღებოა - როგორც ზემოთ ავღნიშნეთ გენიტალური ჰერპესის სამკურნალო კლასიკური პრეპარატებია - აციკლოვირის ნუკლეოზიდები (აციკლოვირი, ვალაციკლოვირი, ფამაციკლოვორი), თუმცა ბოლო დროს, სულ უფრო ხშირია აციკლოვირის (და მისი მსგავსი პრეპარატების) მიმართ მდგრადი ვირუსების გავრცელების შემთხვევები.

ამიტომ, რეკომენდებულია აციკლოვირის ტიპის პრეპარატების ხშირი ჩანაცვლება ერთმანეთით (მაგალითად აციკლოვირის ვალტრექსით ჩანაცვლება) ან მათი გამოყენება პრეპარატ ინტერფერონთან ერთად.

ინტერფერონი ორგანიზმის ერთ-ერთი ყველაზე ძლიერი ცილაა, რომელსაც ადვილად შეუძლია ამოიცნოს უჯრედში შეჭრილი ინფექციის გამომწვევი და ხელი შეუშალოს მის გავრცელებას.

მიიჩნევა, რომ სწორედ ორგანიზმში ინტერფერონის ნაკლებობა არის ჰერპესის რეციდივების მიზეზი.

ამიტომ, გენიტალური ჰერპესის დროს კარგია, თუ გამოყენებული იქნება პრეპარატი, რომელიც ერთდროულად შეიცავს როგორც აციკლოვირს, ასევე ინტერფერონს. ასეთი პრეპარატია მაგალითად გერპფერონი. გენიტალური ჰერპესის მტკივნეული მიმდინარეობის გათვალისწინებით, გერპფერონის კრემის შემადგენლობაში შედის ლიდოკაინი, რომელიც უზრუნველყოფს გაუტკივარებას.

 

გენიტალური ჰერპესის გარეგანი მკურნალობა

 

გენიტალური ჰერპესის გარეგანი მკურნალობაგენიტალური ჰერპესის მკურნალობისთვის, ანტივირუსული თერაპიის პარალელურად ინიშნება ისეთი გარეგანი საშუალებები, როგორიცაა:

»» აციკლოვირის კრემი;

»» ზოვირაქსის კრემი;

»» პანავირის გელი ან კრემი;

»» ეპიგენის კრემი, გელი ან სპრეი;

»» დენავირის (პანციკლოვირი) კრემი;

»» ჰერპევირი კრემი;

»» დოკოზანოლი კრემი;

»» ოქტენისეპტი სპრეი;

»» დევირსი;

»» და სხვა...

მათი გამოყენება ხდება ანტივირუსული თერაპიის პარალელურად.

რთულია თქმა, ამ პრეპარატებიდან რომელია ყველაზე ეფექტური, რადგან გენიტალური ჰერპესი ყველა ადამიანისთვის სხვადასხვა კლინიკური ნიშნებით მიმდინარეობს და სხვადასხვა სახის კრემების მოქმედებაც ინდივიდუალურია.

თითეულ ამ პრეპარატს ჰყავს როგორც ძალიან კმაყოფილი, ასევე უკმაყოფილო მომხმარებელი. ამიტომ, მკურნალ ექიმთან შეთანხმებით შეგიძლიათ სცადოთ თითეული მათგანი ყოველი ახალი რეციდივის დროს და თავად დარწმუნდეთ, თუ რომელი პრეპარატია თქვენთვის ყველაზე ეფექტური და შედეგის მომტანი.

 

გენიტალური ჰერპესის მკურნალობა ვირუსოთერაპიით

 

გენიტალური ჰერპესის მკურნალობა ვირუსოთერაპიითთუ იმუნიტეტი დაქვეითებულია, არანაირ ვირუსოთერაპიას და გარეგან საშუალებებს არ ძალუძთ ჰერპესთან ბრძოლა იმუნური სისტემის მოწესრიგებისა და იმუნიტეტის ამაღლების გარეშე.

დაუშვებელია იმუნიტეტის ასამაღლებელი სამედიცინო საშუალებების დამოუკიდებლად მიღება, რადგან ყოფილა შემთხვევები, როცა იმუნიტეტი წესრიგში ყოფილა და არაკომპეტენტურად მიღებულ იმუნურ პრეპარატებს ისე აურევია იმუნური სისტემა, რომ ჰერპესის რეციდივები პირიქით, გაზრდილა კიდეც.

იმუნოთერპია ინიშნება ექიმ ალერგოლოგ-იმუნოლოგის მიერ, პაციენტის იმუნური სისტემის მდგომარეობის შესწავლის შემდეგ.

ხშირ შემთხვევაში, ჰერპესის ძალიან ხშირი რეციდივების მიზეზს იმუნოდეფიციტი წარმოადგენს.

იმუნოდეფიციტი შეიძლება იყოს მუდმივი, ან ტრანზიტორული (წარმავალი).

ტრანზიტორული იმუნოდეფიციტი ვლინდება ამინდის ცვლილების დროს - ზამთარი-შემოდგომა, ზამთარი-გაზაფხული, აგრეთვე შინაგანი ფაქტორების ზემოქმედებით - ალკოჰოლის მიღება, ზედმეტად გაცივება ან გადახურება, ზოგიერთი მედიკამენტის მიღება და ა.შ.

ამ შემთხვევაში, ორგანიზმის თავდაცვითი ფუნქციის მოქმედების შემცირება, ხელს უწყობს ვირუსის გააქტიურებას. სპეციალისტის მიერ დანიშნულ იმუნიტეტის ასამაღებელი საშუალებების მიღება კი ახდენს იმუნური სისტემის მდგომარეობის კორექტირებას და ამცირებს რეციდივების რისკს.

იმუნოთერაპიის დროს კარგად გამოავლინეს თავი და  ხდება შემდეგი იმუნოსტიმულიატორების გამოყენება:

»» ლიკოპიდი;

»» ინოზინი პრანობექსი (იზოპრინოზინი);

»» ნატრიუმის რიბონუკლეატი (რიდოსტინი);

»» ნეოვირი;

»» ციკლოფერონი;

»» ინტერფერონი (ვიფერონი);

»» ტილორონი (ამიქსინი, ლავომაქსი);

»» არბიდოლი;

»» ალპიზარინი;

»» ტრომანტადინი (ვირუ-მერცი);

»» რიმანტადინი (რემანტადინი, ალგირემი);

»» და სხვა;

ეს პრეპარატები ფლობენ ანტიანთებით, ანტიტოქსიკურ, ანტივირუსულ და რაც მთავარია იმუნომასტიმულირებელ თვისებებს.

გენიტალურ ჰერპესთან საბრძოლველად, საჭიროა მეტაბოლური თერაპიაც. ტრანზიტორული იმუნოდეფიციტი, შეიძლება მიმდინარეობდეს ორგანზმზე პროოქსიდანტური დატვირთვის ფონზე, ამიტომ ანტიოქსიდანტების მიღება აუცილებელია ჰერპესის რეციდივების რისკის შესამცირებლად.

ამ ჯგუფის ნივთიერებებს კი მიეკუთვნება ისეთი ბუნებრივი ანტიოქსიდანტები, როგორიცაა:

ვიტამინი A, E, C და მიკროელემენტები თუთია და სელენი.

ამ ნივთიერებების შემცველი ნებისმიერი ვიტამინების კომპლექსის მიღება ადრეულ გაზაფხულზე და ადრეულ შემოდგომაზე, საგრძნობლად ამცირებს ჰერპესის რეციდივების რისკს.

ადაპტოგენები - ჰერპესის დროს კარგ ეფექტს იძლევა ადაპტოგენების მიღება. ხშირად ისინი ეშლებათ იმუნოსტიმულიატორებში, მაგრამ ეს სხვა ჯგუფია. ადაპტოგენები შეიძლება იყოს როგორც მცენარეული და ცხოველური წარმოშობის ქიმიური ნივთიერებები, ასევე ხელოვნურად სინთეზირებული ან კონსტრუირებული ბიოლოგიურად აქტიური ნივთიერებები.

თუმცა ადაპტოგენები ასევე აძლიერებენ იმუნურ სისტემას, ორგანიზმის თავდაცვით ფუნქციებს და მათი გამოყენება ხდება როგორც დაავადებების სამკურნალოდ, ასევე პროფილაქტიკის მიზნით. ხშირად ადაპტოგენების მიღება რეკომენდებულია ჯანმრთელი ადამიანებისთვისაც კი.

ადაპტოგენებს განეკუთვნება: ჟენ-შენი,  ელეუტეროკოკი, ლამინარია, ჩინური ლიმონურა,  და სხვა..

ეს ნივთიერებები აჩქარებს ლეიკოციტების გამომუშავებას, აღადგენს დაზიანებულ უჯრედებს, რაც ძალიან მნიშვნელოვანია ჰერპესული წყლულების შეხორცებისთვის.

 

გენიტალური ჰერპესის მკურნალობა ჰომეოპათიით

 

გენიტალური ჰერპესის მკურნალობა ჰომეოპათიითსხვადასხვა ჰომეოპათიური პრეპარატები საკმაოდ ეფექტურია ჰერპესის მიმდინარეობის შესამსუბუქებლად და მისი პრევენციისთვის.

კლინიკურმა გამოკვლევებმა დაასაბუთა ზოგიერთი ნოზოდისა და მათი ბიოქიმიური შედმადგენლობის ეფექტურობა.

(ნოზოდი არის ორგანული, ჰომეოპათიური პრეპარატი, რომელიც დამზადებულია ადამიანის ან ცხოველის პათოლოგიურად შეცვლილი ქსოვილებისგან, ამ ქსოვილების გახრწნილი პროდუქტებისგან, ან დაავადების გამომწვევი უჯრედების კულტურისგან).

აკონიტი - ეფექტურია ცხელების, წვისა და ანთების დროს;

ყურის გოგირდი (გოგირდის საცობი) - ზოგადად, გოგირდის შემცველი პრეპარატები - ამცირებს ჰერპესის რეციდივების შესაძლებლობას, აწესრიგებს კანის საფარს, ამცირებს შეშუპებას და ანთებით რეაქციებს, ხელს უწყობს ეპითელიზაციას (წარმოქმნის ეპითელს (ეპითელი არის ქსოვილი, რომელიც ფარავს კანის ზედაპირს) რომელიც ავსებს კანის ან ლორწოვანის დაზიანებული ადგილის დეფექტს)

ნატრიუმ მურიატიკუმ 6 (Natrium muriaticum 12) - ეფექტურია ყოველ დილით ჭამამდე 3 გრანულის მიღება.

ალიუმ სატივა 6 (Allium Sativum 6) -  ეფექტურია 5 გრანულის მიღება დილით და საღამოს.

ფერუმ მურიატეკუმი 200 (Ferrum muriaticum 200) - 5 გრანული ერთჯერადად ღამით.

და ა.შ...

გაფრთხილება: რაც შეეხება ზუსტ დოზებს და მკურნალობის ხანგრძლივობას, დაუშვებელია ამ პრეპარატების მიღება და დიზების განსაზღვრა გამოცდილი, პროფესიონალი ჰომეოპათის გარეშე, რომელიც დთავად განსაზღვრას თუ რომელი პრეპარატების და რა დოზით მიღებაა საჭირო კონკრეტული პაციენტისთვის.

პს. აქვე დავწერთ ჰომეოპათიურ პრეპარატებს, რომლებსაც შესაძლოა არ იცნობდნენ საქართველოში, მაგრამ მათ წარმატებით იყენებენ გენიტალური ჰერპესის წინააღმდეგ ევროპასა და ამერიკაში: Clematis, Pulsatilla, Rhus toxicodendron, Sepia,Sulfur, Tellur, Bufo Rana, Causticum,Croton, Dulcamara, Kreosotum და სხვა...

ჰომეო-პრეპარატების შერჩევის დროს, გამოცდილმა ჰომეოპათმა უნდა მიაღწიოს პაციენტის დაავადების პათოგენეზისა და ჰომეოპათიური პრეპარატის პათოგენეზის მაქსიმალურ შესბამისობას ისე, რომ არ გადაუხვიოს ჰომეოპათიის კლასიკურ პრინციპებს, რათა მოხდეს სასურველი შედეგის მიღწევა.

 

გენიტალური ჰერპესის მკურნალობა ხალხური მეთოდებით

 

გენიტალური ჰერპესის მკურნალობა ხალხური მეთოდებითგენიტალური ჰერპესის მკურნალობა, უფრო სწორად მისი მტკივნეული „შემოტევის მოგერიება“ სახლის პირობებშიც არის შესაძლებელი.

ამას დიდი მნიშვნელობა აქვს, განსაკუთრებით მაშინ, თუ ტკივილი აუტანელია, ხოლო სამედიცინო პრეპარატები არ არის ეფეტური ტკივილების გასაყუჩებლად.

მაშ ასე ქვემოთ მოყვანილი მეთოდები საგრძნობლად ამსუბუქებს ტკივილს, ამცირებს ჰერპესით გამოწვეულ დისკომფორტს, და კარგ საშუალებებს წარმოადგენს გამონაყარის ადგილზე დარჩენილი ჭრილობების სწრაფად შესახორცებლად.

 თეთრი კასტელანის ხსნარი - საკმაოდ ეფექტური საშუალებაა ჰერპესული წყლულების მოსაშუშებლად. მისი შეძენა შეიძლება ნებისმიერ აფთიაქში. მოხმარებაც საკმაოდ მარტივია: უპირველეს ყოვლისა კარგად დაიბანეთ საპნით და გაიმშრალეთ კანის დაზიანებული მონაკვეთები, შემდეგ დაასველეთ კასტელანის ხსნარში ბამბის ჩხირები და ფრთხილად წაისვით კანის დაზიანებულ მონაკვეთებზე. გაიმეორეთ პროცედურა დღეში 4-5 ჯერ.

 პროპოლისის მალამო - გენიტალური ჰერპესის წყლულების შესახორცებლად და მალე მოსაშუშებლად ეფექტურია ნატურალური პროპოლისისგან (დინდგელი) დამზადებული მალამო. იგი სწრაფად აალაგებს ჭრილობას გვრის შვებას. პროპოლისის მალამოს შეძენა შესაძლებელია სპეციალიზირებულ აფთიაქებში.

თაფლი + ქრისტესისხლა - საგრძნობლად ამსუბუქებს საერთო მდგომარეობას გენიტალური ჰერპესის დროს. მომზადებაც საკმაოდ მარტივია: საჭიროა ერთმანეთში აურიოთ გამომშრალი ქრისტესისხლა და ცაცხვის თაფლი. მიღებული ფაფისებრი მასა კი უნდა წაისვათ კანის დაზიანებულ ადგილებზე მანამ, სანამდე წყლულები საბოლოოდ არ გაქრება.

ქრისტესისხლას წვენი - საჭიროა მისი წინასწარ მომზადება: ნედლი ბალახი გაატარეთ ხორცის მანქანაში. გადაწურეთ წვენი და ჩაასხით მუქი ფერის მინის ფლაკონში. მჭიდროს დაახურეთ და დააყენეთ ერთი კვირის განმავლობაში. დროდადრო მახადეთ საცობი, რათა გამოუშვათ დაგროვილი გაზები. როცა ნაყენი მზად იქნება, წაისვით ჰერპესით დაზიანებულ კანი მონაკვეთებზე 3-ჯერ დღეში.

სოდა და სიმინდის კრახმალი - საკმაოდ ეფექტურია რომელიმე ამ ფხვნილის გამოყენება ჰერპესის ღია წყლულებზე ან ჭრილობებზე.

ზოგადად, იცოდეთ, რომ ჰერპესი კარგად გრძნობს თავს და „ყვავის“ სველ და ტენიან გარემოში, ამიტომ თუ კარგად გაასუფთავებთ და გააშრობთ კანის დაზიანებულ მონაკვეთებს, წყლულები მალე შეხორცდება. სოდისა და სიმინდის კრახმალის დადება კანის დაზიანებულ მონაკვეთებზე შესაძლებელია ბინტის ტამპონის საშუალებით. გამოიყენეთ ერთი ან მეორე ფხვნილი მანამდე, სანამ ჭრილობები არ შეხორცდება.

ექინაცეა - მისი ექსტრაქტი შესანიშნავი საშუალებაა იმუნური სისტემის სტიმულირებისთვის. ამიტომ, ექინაცეას დანამატები ეფექტურად ეწინააღმდეგება და აჩერებს ჰერპესის ვირუსის გააქტიურებას.

ლიზინი - საკმაოდ ეფექტურია ჰერპესის აქტიური პერიოდის ვადის შესამცირებლად, მაგრამ კიდევ უფრო ეფექტურია ჰერპესის რეციდივების შემცირების თვალსაზრისით. ლიზინი ახდენს არგინინის ზემოქმედების ბლოკირებას. არგინინი ხელს უწყობს ჰერპესის ვირუსის გამრავლებას, ლიზინი კი ბლოკავს მას.

ლიზინის მიღება საჭიროა როგორც ჰერპესი გააქტიურების პერიოდში, ასევე სიმპტომების გამოვლენამდეც.

ლიზინის მიღები დროს სიფრთხილე უნდა გამოიჩინონ მათ, ვისაც აწუხებს ქვები ნაღვლის ბუშტში ან აქვთ ქოლესტერინის მაღალი დონე.

ლიზინს შეიცავს თევზი, კვერცხი, კარტოფილი და ქათმის ხორცი, მაგრამ შეიძლება მისი თავისუფალი სახით მიღებაც - გრანულების სახით - 1გრ 3-ჯერ დღეში.

ციმბირული ჟენშენი - აძლიერებს იმუნურ სისტემას, აცხრობს ჰერპესის მწვავე შემოტევებს მძიმედ მიმდინარეობის დროს და ამცირებს მისი აქტიურობის ვადას. ელეუტეროზიდები ციმბირული ჟენშენის აქტიური კომპონენტია და ხელს უწყობს ჰერპესის წყლულოვანი ჭრილობების სწრაფ შეხორცებას.

ციმბირული ჟენშენი ხელმისაწვდომია აფთიაქებში - მყარი, თხევადი ან ფხვნილის სახით.

ლიმონის პიტნა (მელისა) - მელისა დამთრგუნველ ზემოქმედებას ახდენს ჰერპესის ვირუსზე. იგი ხელს უშლის ვირუსს კანის უჯრედების დაზიანებაში. მნიშვნელოვანია მელისა მიიღოთ ჰერპესის პირველი სიმპტომების გაჩენისთანავე, რადგან თუ უჯრედები უკვე ინფიცირებულია ჰერპესის მიერ, მისი მოქმედება ნაკლებად ეფექტურია.

გამოიყენეთ 1%-იანი ექსტრაქტი 4-5-ჯერ დღეში.

ჰამამელისი - ეს არის თხევადი ხსნარი, რომლის შეძენაც აფთიაქებშია შესაძლებელი. აიღეთ ბამბის ტამპონი, დასველეთ ცოტაოდენ ჰამამელისის ხსნარში, დაიდეთ ჰერპესით დაზიანებულ კანის მონაკვეთზე და გააჩერეთ 2-3 წუთი. თავდაპირველად შესაძლოა იგრძნოთ ტკივილი, მაგრამ მალე იგი გაივლის. გამოიყენეთ ჰამამელისი დღეში 3-ჯერ და რამოდენიმე დღეში წყლულები მოშუშდება და გაქრება.

შავი ჩაის პაკეტი - პირველ რიგში, დაასხით ერთ პაკეტ შავ ჩაის მდუღარე წყალი და მაშინვე გააცივეთ იგი. ამის შემდეგ დაიდეთ პაკეტი ჰერპესულ წყლულზე. იგი დააამებს ჭრილობას და ხელს შეუწყობს ინფექციის ჩაცხრობას.

სოჭის ზეთი - უნდა წაისვათ ჰერპესით დაზიანებულ ადგილებში ყოველ 2 საათში, სანამ წყლულები საბოლოოდ არ მოშუშდება.

ლოე ვერა - ალოე ვერას წვენი აჩქარებს ჰერპესის წყლულების შეხორცებას და ზგადად, ხელს უწყობს გენიტალურო ჰერპესის სწრაფად მკურნალობას. წვენი უნდა იყოს გამოწურული ალოეს ძველი მცენარიდან (არანაკლებს 3 წლისა).

საჭიროა ნახევარი სუფრის კოვზი წვენი  წაისვათ გენიტალიების დაზიანებულ ადგილებზე, დააცადოთ გაშრობა და მხოლოდ ამის შემდეგ ჩაიცვათ საცვალი.

ალოეს წვენით ამ სახის მკურნალობა რეკომენდებულია მამაკაცებისათვის, რაც შეეხებათ ქალებს, ვაგინალური ჰერპესის დროს, ალოეთი მკურნალობის წესი სხვაგვარია:

უნდა აიჭრას ალოეს პატარა ნაჭრისგან ალოეს ქერქი და უნდა იქნას შეყვანილი საშოში (როგორც სანთელი). ალოე საშოში უნდა იყოს დაახლოებით ნახევარი დღის განმავლობაში. მკურნალობა კი გაგრელდეს მანამ, სანამ ჰერპაესი მთლიანად არ გაქრება.

კალანჰოე - გამოწურეთ კალანჰოეს წვენი და წაისვით კანის დაზიანებულ ადგილებზე ყოველ 3 საათში შედეგის მიღწევამდე.

ვალოკორდინი - დაასველეთ ბამბა ხსნარში და დაიდევით კანის დაზიანებულ ადგილებზე რამოდენიმე წამის განმავლობაში. გაიმეორეთ დღეში 3-ჯერ.

სოდის აბაზანები - სოდის აბაზანები ძალიან ეფექტურია გენიტალური ჰერპესის მკურნალობის დროს. ასეთი პროცედურები აუმჯობესებს ადგილობრივ სისხლის მიმოქცევას და ხესლ უწყობს წყლულების სწრაფ შეხორცებას.

განსაკუთრებით ეფექტურია მჯდომარე აბაზანები ქალებისთვის, რომელთაც აქვთ ვაგინალური ჰერპესი და სასქესო ორგანოების ანთებები.

სოფდის აბაზანა უნდა მომზადდეს ემდეგნაირად:

აავსეთ აბაზანა თბილი წყლით (იმ დონემდე, რომ წყალმა დაფაროს დუნდულები და თეძოები). წყალი უნდა იყოს საკმარისად თბილი, რათა იძლეოდეს კომფორტულობის შეგრძნებას, მაგრამ არა ზედმეტად ცხელი, რათა არ დაიწვათ.

დაუმატეთ წყალში ნახევარი კილო საკვები სოდა. ყურადღება მიაქციეთ, რომ იგი ბოლომდე გაიხსნას წყალში, ამის შემდეგ ჩაჯექით აბაზანაში 20-30 წუთის განმავლობაში.

პროცედურა გაიმეორეთ კვირაში რამოდენიმეჯერ, მანამ, სანამ წყლულები ბოლომდე არ შეხორხცდება.

აბაზანიდან ამოსვლის შემდეგ ფრთხილად (სუფთა პირსახოცის ფაქიზი დადებით) გაიშრეთ დაზიანებული ადგილები (ზოგიერთი სპეციალისტი თვლის, რომ პირსახოცი საერთოდ არ არის საჭირო და უნდა მოიცადოთ, სანამ კანი თავად არ გაშრება).

ყინული - მწვავე ტკივილის დასაამებლად, ეფექტურია ჰერპესის წყლულებზე ყინულის დადება. იგი წარმატებით აფერხებს ქავილისა და წვის შეგრძნებას.

თუმცა ნუ დაიდებთ ყინულს 15 წუთზე მეტი ხნის განმავლობაში, რადგან სიცივის ხანგრძლივმა ზემოქმედებამ შესაძლოა კანის ქსოვილებისა დაზიანება გამოიწვიოს.

მარილი - წყლულების შეხორცებას აჩქარებს კანის დაზიანებულ მონაკვეთებზე ჩვეულებრივი, სუფრის მარილის დადება (უმჯობესია მსხვილი მარილი). გაიმეორეთ დღეში რამოდენიმეჯერ.

ნიორი - დაჭერით ნიორი მცირე ნაჭრებად და წაისვით ჰერპესით დაზიანებულ კანის მონაკვეთებზე. იგი კარგად ებრძვის ჰერპესის ვირუსს.

თაფლი + ვაშლის ძმარი - შეურიეთ ერთმანეთში თაფლი და ვაშლის ძმარი ისე, რომ მიიღოთ ერთგვაროვანი მასა და წაისვით ჰერპესით დაზიანებულ კანის მონაკვეთებზე. გააჩერეთ მთელი ღამის განმავლობაში.

მოხარშული კვერცხის კანი - მოხარშულ კვერცხს ფრთხილად მოაცილეთ კანი და დაიკარით ჰერპესით დაზიანებულ კანის მონაკვეთებზე. იგი შესანიშნავი ანტიანთებითი თვისებებით გამოირჩევა.

თბილი აბაზანა - გენიტალური ჰერპესის დროს, ძალიან ბევრი ჩივის მწვავე ტკივილების შესახებ, რაც სამწუხაროდ ძალიან ხშირად თან სდევს ხოლმე ჰერპესს, ამიტომ, თუ ტკივილი ძალიან გაგიმწვავდათ, მიიღეთ თბილი აბაზანა, რომელიც დაგეხმარებათ ტკივილის შეგრძნების შემსუბუქებაში და სხეულის მოდუნებაში.

კარგია თუ აბაზანაში ჩაუმატებთ რამოდენიმე წვეთ ჰერანის ეთეროვან ზეთს.

ამასთან, ხშირად გამოიყენეთ საპონი და დაიბანეთ დაინფიცირებული ადგილები, ძალიან მნიშვნელოვანია, რომ კანი მუდმივად სუფთა იყოს, რათა თავიდან იქნას აცილებული ინფექციის ხელმეორედ შეჭრის საშიშროება.

(არ დაგავიწყდეთ, რომ დაბანის შემდეგ, დაინფიცირებული ადგილები კარგად გაიმშრალოთ)

დაიცავით სიმშრალე - როგორც ზემოთ ავღნიშნეთ, სისველე და ზედმეტი ტენიანობა ნაყოფიერ ნიადაგს ქმნის ჰერპესის „ასაყვავებლად“, ამიტომ ეცადეთ დაინფიცირებული ადგილები მუდმივად მშრალ და სუფთა მდგომარეობაში გქონდეთ.

და სხვა... - ასევე ეფექტურია ჰერპესის სამკურნალოდ ქაცვისა და ჩაის ხის ზეთები, პროპოლისის ნაყენი. წაისვით დღეში 3-4 ჯერ ეს ბუნებრივი საშუალებები ჰერპესით დაზიანებულ კანის მონაკვეთებზე და ჰერპესული წყლულები გაცილებით მალე მოგიშუშდებათ.

პს. ყველა ამ მეთოდის პარალელურად, აუცილებელია: ანტივირუსული თერაპია, გარეგანი საშუალებები და საჭიროების შემთხვევაში იმუნოთერაპია, რომელსაც დანიშნავს სპეციალისტი.

ამასთან ერთად  მნიშვნელოვანია:

მუდმივი ზრუნვა იმუნიტეტის ამაღლებაზე, ჯანსაღი, სრულფასოვანი კვება, ორგანიზმის გაკაჟება და ჯანმრთელი ცხოვრების წესი.

ეს ყველაფერი,  სწორად შერჩეულ, კომპლექსურ მკურნალობასთან ერთად ნაკლები შანსს დაუტოვებს ჰერპესის ვირუსს, რომ მოხდეს მისი გააქტიურება და რეციდევები მინიმუმამდე შემცირდება. შესაძლოა კი საერთოდ გაქრეს.

 
 
 

უკან

 
 
 
  • რეკლამა
  • ჰორო
  • ტესტები

 


 

 

სწრაფი სესხები


თალიზი - Aura.Ge

 

hipp - Aura.Ge

 

დღის აურა