ბაბილინა ხოსიტაშვილი - ახალის ვნებით ვიმოსები...

ახალის ვნებით ვიმოსები ყოველ ახალ წელს,

ახალს გოლგოთას ვეგებები, ვეთხოვები ძველს…

მე რომ სიყვარულს ვღაღადებდი, რა იქნა ისა!

წყვდიადის მეფეს ვინ შესწირა სიმღერა მზისა?

ვინ შემოიჭრა ჩემს ტაძარში, - წარმტაცა ცეცხლი…

წამების ჯვართან ვინ დასტოვა იუდას ვერცხლი!

თუ ჩემს ოცნებას, - სათუთ ყვავილს, - ტალღა წაჰლეკავს,

მყისვე ცა, - მიწის დასამხობად, - ზარს ჩამოჰრეკავს,

ახალის სიტყვით აღჭურვილი მოვალ, ვიქნები…

ახალ სიცოცხლედ იშვებიან ჩემი ფიქრები.