მუნჯ მოგონებით დავიტირე ჩვენი წარსული, ჯვარი დავუსვი ყმაწვილობის თავხედ გიჟობას; ჯერ ახალგაზრდა… და, უდროოდ ხანში შესული - ტანჯვით ვამშვენებ ჩემი ყრმობის ფერმკრთალ დღეობას. აღარც ვნება მაქვს, აღარც გული, - დაჰვკარგე ყველა. სისხლის ფურთხებით ვიტანჯები ქარვის თვეებში… ნეტავ, თუ როდის მეღირსება სიკვდილით შველა?.. ჩვენი გიჟობა… სიყვარული უსაზღვრო შვებით… რა ვქნა არ ვიცი… ვეღარ მხიბლავს შენი შვენება, და, ვერც სამოსი შემკობილი საფირის ქვებით. შენი ღიმილი… და, თვალები ნაზ-ბივრიტისა, ვერც შენი ტანი მოღვედილი ლამაზი ვნებით, ვეღარც სინაზე - სამკაული წმიდა ხატისა. და, რად ასრულდა მხოლოდ ჩვენზე "ზანგის იგავი"; ალბათ, იმიტომ, რომ ვერ გხედავ, - ტრფობით დანატრულს, რომ დავიწყებას ჩავაბარეთ ჩვენი ამბავი. დამიტირებენ მხოლოდ ლანდნი, ჩემი წარსულის; შავი კაცები ჩემს ჩონჩხ სხეულს ცეცხლზე დასწვავენ… იქნება მხოლოდ სახე დამრჩეს ლამაზი სულის. - ნუ! ნუ მიტირებ, ვერას მარგებს ხმა სინანულის, მხოლოდ ამას გთხოვ, და ცოდვები ამით შემინდე: - ყველას აუწყე დაფარული ჩვენი წარსულის!.. |
პოეზიის გვერდი • • • • • • რაჟდენ გვეტაძის პოეზია |