მზია ჩხეტიანი - სამშვიდობოდ თქმული

ერთი მზე გვათბობს,

ერთი პლანეტა,

ერთი იმედით გვზრდიან დედები,

ნუ მომიხდები სამტროდ კარებთან

მიმეგობრე და მტლად დაგედები.

რაკი ერთგვარად გვძულს და ვიყვარებთ,

შური და მტრობა არ გვეკადრება,

ცხრა ზღვის გამოღმა მეც გავიხარებ,

თუ ცხრა ზღვას იქით გაგეხარდება.

კაცი ხარ,

ძმა ხარ,

ზეცამ ინება

და შენი ცრემლი ჩემსას ჩამოჰგავს,

შენ ცხრა მთას იქით თუ გეტკინება,

მე დავიკვნესებ ცხრა მთის გამოღმა.

შენ ზარდე ბაღში შენი მზის ნერგი,

მე ჩემსას დავრგავ,

შენსას რას უშლის,

ასე ვიხაროთ მზით და სიკეთით

შენ - შენს მხარეში,

მე - ჩემს მამულში.

კაცი კაცისთვის უცხო არ გახლავთ,

მე ვარდებს გიწვდი,

ქვას არ გიღერებ...

და ყველა ჰანგზე უფრო ხმამაღლა

დღეს სამშვიდობოს ვამბობ სიმღერებს.