ლადო ასათიანი - ამისი ქმარი სარდაფში მოკვდა...

- ამისი ქმარი სარდაფში მოკვდა, -

 ასე იტყვიან შენზე ქალები, 

 და შენც ასეთი ნაზი და კოხტა 

 სიყვარულს ვერსად დაემალები. 

 - ამისი ქმარი ღვინოში მოკვდა, - 

 ასე იტყვიან შენზე ლოთები, 

 და შენც ასეთი ნაზი და კოხტა 

 ახალ სიყვარულს დაელოდები. 

 - ამ კაცის ცოლმა სხვა შეიყვარა, -

 ასე იტყვიან ჩემზე ბიჭები, 

 გამიხსენებენ, როგორც ნიკალას, 

 და თბილ სამარეს დააბიჯებენ.