პარმენ ლორია - პროფესიის მძებნელი

არ მაქვს სტაჟი ძველი,

არც სწავლის მაქვს ნიჭი

არც ენა მაქვს გრძელი,

ვარ უბრალო ბიჭი.

მეზარება შრომა

არც მიყვარს თამაში,

თუ რომ მომცა დრომა

ვარგვარ მხოლოდ სმაში.

ჭამაც ვიცი კარგი,

ვარგვარ მოლხენაში,

არ მყავს ამხანაგი

შავი ღვინის სმაში.

არ ვარგვარ მე ნოქრად

დავდგე სავაჭროში,

ფული ვიღო ოხრად

ასეთ ქესატ დროში.

არ ვარგვარ ექიმად,

აღარც ორატორად,

მსურს ვიყო ვექილად

სხვებთან ერთად, სწორად.

არ ვარგვარ კომისრად,

არც მილიციელად,

დამსვით თუნდ საფიცრად

ოთხი ბატის მცველად.

არ ვარგვარ არც მცველად,

არც მთოხნელ, ან, მკელად

აღარც ძროხის მწველად,

არც ტურად, ან მელად.

რაში გამოვდგები,

ვინ მიხვდება აბა,

დილას გვიან ვდგები

ვით თავადი საბა.

თუმც ვარ უადგილოდ,

შოვნაზეც არ ვზრუნავ

არვინ გამაწბილოთ

ერთ რამისთვის ვზრუნავ.

ჯერ ვერსად ვერ წავალ,

საქმეს ჯერ ვერ შევძლებ,

უქმად დავალ, მაგრამ

მუცელს მაინც ვიძღებ.