ჯანსუღ ჩარკვიანი - მოეშვი. წადი...

მითხარი, ძმაო,

რაღაც გიჭირს,

რაღაც გაღონებს,

რაღაც გადარდებს.

ჭაობისფერი, გამხდარი ეჭვი,

როგორც მთქნარება ისე გადამდე,

მითხარი, ძმაო,

რაღაც გიჭირს,

რაღაც გაღონებს,

რაღაც გადარდებს.

თუ კი ისევ იმ ბოროტზე ფიქრობ, -

მოეშვი,

წადი და მოიძულე;

იგი საკუთარ სიცოცხლეს იქრობს,

იგი საკუთარ სულს იბინძურებს;

თუ კი ისევ იმ ბოროტზე ფიქრობ, -

მოეშვი,

წადი და მოიძულე.

თუ არა,

ზღვიდან წყალს იღებ საცრით,

გახარებული გიმზერს ლაქია...

ჩვენ სიყვარულის წვიმები გვაწვიმს,

ჩვენი ფიქრები ცაში დაჰქრიან,

ქალაქში ერთი ბოროტი კაცი

თუ არ არსებობს, რა ქალაქია.