ყველა დროის ასული ხარ, სიყვარულით წვავ და ფიტავ... ალბათ ძველად რომ გეცხოვრა, იქნებოდი სერაფიტა. ვერ დაგწამებ ურა ღალატს... იქნებ ის ხარ, ვინც გონება აურია კურაპალატს. ნუშისებრი, ვიწროჭრილი... საიდანაც იმზირება ყველა ჩემი გასაჭირი. ბაგეზე რომ ეჭდო თამარს, როგორც დიდი გამოცანა - ჰოს ნიშნავდა, თანაც - არას. ერთი ხარ თუ ორი ანა... ო, რამდენი სიხარული წაიღო და წარიტანა. სიყვარული იქვე მოდის... რუსთაველის დროს უთუოდ თინათინი იქნებოდი. ბეატრიჩე თუ მანანა... ეთერ ქალო, სჯობს მე დამკრა, ჯიბეში რომ გიდევს დანა. ამავე დროს - ერთადერთი... სრულყოფილი ხარ და მაინც, ვით მდინარე ჩემს ტბას ერთვი. სულს წყურვილით გამოფიტავ... ყველა დროის ასულო და ყველა დროის სერაფიტა. |