ლადო სეიდიშვილი - ცხოვრებამ არ გამიმართლა...

ცხოვრებამ არ გამიმართლა,

მისგან ბევრჯერ გავილახე:

ერთ ლოყაზე სილა მაწნეს,

მეორეზე დამკრეს სახრე...

ბედს კი მაინც არ ვემდური -

ჯერ ის რად ღირს, მზე რომ ვნახე!

არც სიმართლე გამომადგა,

სიცრუემ ხომ მიგო მახე;

არ მახარებს წარმატება,

დამარცხება თავბრუს მახვევს...

ბედს კი მაინც არ ვემდური -

ჯერ ის რად ღირს, ცა რომ ვნახე!

სხვისი გული ვერ მოვიგე,

თუმცა მესხდნენ მეინახედ...

ყველგან კვანტი გამომიდეს

მიზნად რაც კი დავისახე...

ბედს კი მაინც არ ვემდური -

ჯერ ის რად ღირს, ზღვა რომ ვნახე!

ამ ცარიელ სულს რა მივსებს,

ლექსს დავწერ და იქვე დავხევ...

სიყვარულმაც კბილი გამკრა -

გრძნობა გულში დავიმარხე.

ბედს კი მაინც არ ვემდური -

ჯერ ის რად ღირს, შენ რომ გნახე!