გრიგოლ ცეცხლაძე - აძინებს მიწას საღამო გრილი

აძინებს მიწას საღამო გრილი

ეუბნებიან ტალღები ნანას

ზურმუხტოვანი ტურფა აპრილი

ვარდ-ყვავილებით ჰმოსავს ქვეყანას.

მე შენ პირველად დღეს გაგიცანი,

დახარბებული მზერით გიცქერი:

ჰაეროვანი მსუბუქი ტანი,

ცისფერი თვალი, თმა ხორბლისფერი...

გვეალერსება ზღვიდან ნიავი,

ყვავილთა სუნთქვა ბაღიდან მოდის,

ასე მგონია ერთად ვიყავით

წინათაც, მაგრამ არ მახსოვს როდის.