თეიმურაზ ლანჩავა - აპრილი?!

აპრილი?!

არ მიყვარს აპრილი,

პირველად აპრილში ავტირდი,

პირველად აპრილში გაკოცე,

პირველად აპრილში ამტკივდი.

მოვედი,

ვიყავი,

მივდივარ,

საფლავშიც აპრილი მიმყვება,

წაიღეს დღეებმა რაც მქონდა,

აპრილი ვერ მოკლეს ბრიყვებმა.

ძვირფასო, სიკვდილს რომ უცინი,

გგონია ვერ გხედავ,ვერ გამჩნევ?

უჩემოდ გამხდარხარ გულცივი,

დრო მოვა, სიკვდილსაც შეგაჩვევ,

მწარეა სიბერე უძლური,

გიყვარდეს ადვილი როდია,

მომწყინდა ამქვეყნად ძუნძული,

მოვეშვი უსაქმოდ ბოდიალს.

ატმების ყვავილთა ალში ვარ,

გულს ცეცხლი უნთია კმაყოფილს,

მე ისევ პატარა ბავშვი ვარ,

მე ერთი სიცოცხლე არ მყოფნის.

ნუ მეტყვით,

ისედაც განვიცდი,

რომ წლები ჩათავდა წამებად,

ის წლები, ღმერთმა რომ მაჩუქა,

ოცნებად, ტკივილად, წამებად.

აპრილი?!

არ მიყვარს აპრილი,

პირველად აპრილში ავტირდი,

პირველად აპრილში გაკოცე,

პირველად აპრილში ამტკივდი.