იოსებ გრიშაშვილი - სინანული

რად მიყვარდი, რად გეტრფოდი,

ვნებით გული რად მითრთოდა,

ნეტავ შენგან რას ველოდი, -

რა მინდოდა, რა მინდოდა?!

ვით ფარვანა გევლებოდი,

ლხენით ფრთები მემსხვრეოდა,

მე თვით მიკვირს, რად ვკვდებოდი, -

რა მინდოდა? რა მინდოდა?

ჩემი გულის მოწოდება

სწორ მიზნისკენ მიდიოდა,

რად გიხილე? რად ვიწოდი?

რა მინდოდა? რა მინდოდა?

რად არ მითხარ, თუ იცოდი,

რომ ეგ გული სხვისკენ რბოდა,

რად მომშხამე, რას მერჩოდი? -

რა გინდოდა?! რა გინდოდა?!