შოთა ნიშნიანიძე - ბაბუა

შეგხვდი და გული გადამიქანდა,

ნუთუ შენა ხარ? საიდან... როგორ?...

ამ ტყეში მუხად რამ მოგიყვანა,

ბოჩოლას ეძებ თუ ქამა სოკოს?

და როგორც ერთ დროს შვილიშვილები,

ახლა ჩიტები შეგისვამს ზურგზე,

მათ ნება-სურვილს ემორჩილები,

ხან მზეს უჩრდილებ, ხან ბუდეს ურწევ.

ბაბუ, ჩიტებში რატომ გაგვცვალე,

ტყეში რა გზით და როგორ მოხვედი,

ნუთუ ტყე არის შენი საძვალე,

მუხადქცეულო სულო კოლხეთის...