ვახტანგ ჯავახაძე - ეს ვინ ყოფილა?!

ჩეკამ რომ ცოლი წაჰგვარა,  ქურდმა რომ პალტო მოპარა,

კარი რომ გვიან გაუღო ორშაბათების ოპერამ,

ძამიკო - რომ ამჯობინა - გენაცვალეს და ჭირიმეს,

ტრამვაიში რომ სამასი კაპიკით დააჯარიმეს,

წიგნი რომ დაუგვიანეს, პრემია რომ არ აღირსეს,

ხელი რომ ბევრჯერ აუკრეს ლურჯა ცხენების აღვირზე,

სახლი რომ დაუხურდავეს, რითმაც რომ დაუხურდავეს,

ძილშიც რომ ვერ დაემალა, სიზმარშიც - სულთამხუთავებს,

კოლეგამ ყულფში ფანჯრისა თავი რომ გააყოფინა

და სკამი გამოაცალა, - გალაკტიონი ყოფილა!