ბარები დაკეტეს, ქალაქი ჩუმია, ცარიელ ქუჩებში ძუნძულებს ავდარი; კაშნეზე იაფი თამბაქოს სუნია და ჩემი ოცნება ღრუბლებო მანდ არი!
ვიღაცამ უსიტყვოდ ვიღაცა დატოვა, მგზავრები დავკარგე და ახლა ვაგონში ყველაფრით, ყველასთვის, ყველაზე მარტო ვარ.
გალუმპულ ჭადართან ლამპიონს ეძინა; არსად პოეზია, აღარსად მხატვრები სამყაროს მათგან ხომ ღიმილი ეწყინა.
ჰაერშიც იგივე ნოემბრის სუსხია ყვავილებს სუნთქვა რომ თოვლის ქვეშ ჩარჩებათ შენს შემოსაშვებად დავტოვებ სულს ღიად.
წვიმაში ვიცეკვოთ, ქალაქი ჩუმია, მგზავრები დავკარგე და ახლა ვაგონში მარტო ვარ, იაფი თამბაქოს სუნია. |