მაყვალა მრევლიშვილი - ნიკო ფიროსმანაშვილი

- ერთი დიდი სამოვარი, გარეშემო - მხატვრები!

გულგაშლილი საუბარი, სხვას რას მოვინატრებდი!

- სხვაც ბევრი რამ ენატრება გულამომწვარს არყითა,

მისი ხელი მიკიტანმა იყიდა და გაყიდა.

კალო, ნუკრი, ლურჯი სუფრა - გაფრენილან უკან და

სამუშაოს მოლოდინში ატუზულან დუქანთან.

სულს ღაფავენ კალმახები ღრიანცელის იქითა,

არ იწვევენ ძმობილები გამოწვდილი ჭიქითა.

მეუღლესაც, მეგობარსაც ერთ ქალში რომ ეძებდა -

მხატვრის თითი დაიწუნა საქორწინო ბეჭედმა.

დედასავით მოალერსედ არვინ შეხვდა იმედად...

აბრას ცალი ფრთა ჩამოსთრევს, ქარმა თუ გაიმეტა?

ფეხმა ლანჩა მოიძულა? რად მოუჩანს ცერები?

ფუნჯი არ აქვს? მთლად ფუნჯია მოშვებული წვერებით!

...მტკვარმა მისი ნახატები ჩაატარა ტივტივით,

ქუჩის მტვერში ჩაიკეცა ფეხგაკრული გვრიტივით.