ნოდარ თავბერიძე - გააჩერეთ დედამიწა, ჩავდივარ!

დედამიწა ტრიალებსო...  

ბრუნოს უთქვამს ცივ გონზე, 

სიმართლე არ დაუჯერეს!

მიტომ დასწვეს კოცონზე...

აბა მე ვინ შემიცოდებს?! 

უსაქმურად ვაგდივარ... 

გააჩერეთ დედამიწა,

ჩავდივარ!

ოდეს კაცად წოდებული, 

ახლა მხოლოდ ბარგი ვარ.. 

დამიჯერეთ მართალს ვამბობ,

დამიჯერეთ ნაღდი ვარ!

ცხოვრებისგან გალახული 

აღარავის  ვარგივარ... 

გააჩერეთ დედამიწა,

ჩავდივარ !

ბროლის კოშკებს რომ ვაგებდი, 

სულ სხვას ვფიქრობ ამჯერად... 

მარტო ღმერთის იმედი მაქვს,

სხვა არაფრის არ მჯერა!

ვის აფიქრებს ვინ ვიყავი?! 

დღეს ხომ მხოლოდ ლანდი ვარ... 

ვაჟკაცურად, გააჩერეთ...  

ჩავდივარ!