პოლ ვერლენი - ქალი და კატა

ქალის კალთაში ნებივრობს კატა,

ერთ რამედა ღირს თვალთვალი ამის,

მარმარა ხელი და თოვლა თათი

ანცობენ ბინდში დამდეგი ღამის.

პირველს თათმანის მაქმანის ჩრდილით

გადაუმალავს, ვითარცა გვესი,

აქატით თლილი ათივე ფრჩხილი,

სამართებლისებრ მკვეთი და მკვესი.

მეორეც ისე დათაფლულია,

ბრჭყალი ბუდეში მიმალულია,

თუმცა ეშმაკი აქვე ტრიალებს…

და ბუდუარში, სადაც წყვეტილი

ბგერა კისკისად გამოწკრიალებს,

ელავს ფოსფორის ოთხი წერტილი.