იორამ ქემერტელიძე - დაბინდულია შენი თალარი...

დაბინდულია შენი თალარი,

გადათქორილი წვიმის წინწკლებით.

ცვივა წვეთები ბროლისთანანი

და ღამესავით ბნელში იწყები.

გამოხვალ, დგახარ... ჩქამი არსაით...

მხრებზე ხავსივით გადევს ტყაპუჭი

და ფეხშიშველა წვიმა ძმასავით

მოგდევს კიბეზე ფეხის ტყაპუნით...

ნედლი სუნელი მოგაქვს დალალით,

როგორც ტკივილის გადავიწყება.

გაფოთლილია შენი თალარი

და გაზაფხული ახლა იწყება.