ნიკო გომელაური - არ იწერება ლექსი უბრალოდ...

არ იწერება ლექსი უბრალოდ

ან უფულოდ ხარ, ანდა უქალოდ.

იქნებ პირიქით ქალუხვი სულაც

ბანკში დროულად გიხდიან ფულსაც.

განიცდი ცოლი დაუწვა თამაზს,

იქნებ პირიქით ოცნებობ ამას...

იქნებ გაღელვებს მეზობლის ქალი,

იქნებ გაკლია კიდური ცალი.

იქნებ სიმთვრალე დაგჩემდა ცუდი

და დილაობით არ გშველის ლუდი...

იქნებ დასტირი მეგობრებს წასულს,

ან შენი ნახვა მეგობრებს არ სურთ...

ვერ ეხმარები იქნებ მათხოვარს

არ ერიდება სხვა რომ განცხრომას.

იქნებ გინდა რომ გასცილდე ქალაქს

გაესაუბრო "იორიკის ქალას".

იქნებ ცრემლები აღარ გერევა

და აღარავინ არ გემტერება.

იქნებ დაეძებ დაკარგულ გრძნობას

სოციალისტურს მისტირი წყობას.

დილიდანვე ხარ უკვე დაღლილი,

იქნებ ზამთარში ცხოვრობ გახდილი.

ირგვლივ რაც ხდება თუ მიგაქვს გულთან,

თუკი განიცდის რაღაცას მუდამ.

გული რომ განცდით დაისერება,

ლექსებიც მერე დაიწერება.