ნიკო გომელაური - ნახე, როგორ მოუწყვიათ ბინა...

ნახე, როგორ მოუწყვიათ ბინა:

ჭერზე ბროლის ჩამოკიდეს ჭაღი.

ფარჩის ფარდით დაუფარავთ მინა.

ვარდის ბუჩქით გააშენეს ბაღი.

როიალი ძველისძველი.

ტახტი - რომელიღაც ლუი.

არ შეახო სერვიზს ხელი

(რომ ვთქვა, რა ღირს - იტყვი - უი!).

ძვირფას ქურქისთვის - ოქროს საკიდი,

სეროვის ტილო თვალს ეფერება.

ერთი რამ დარჩათ მხოლოდ საყიდი

- ის, რასაც ჰქვია ბედნიერება.