ნიკო გომელაური - მუდამ ვუჩივი ამინდს

მუდამ ვუჩივი ამინდს,

წვიმს, თუ გამოიდარა.

მუდამ ვიძახი "ამინ"-ს,

საჭიროა თუ არა.

მუდამ ვღალატობ პრინციპს,

დამჟანგა ცივმა ოფლმა.

მუდამ მიკვირდა პრინცის

- ყოფნა და მხოლოდ ყოფნა.

მუდამ რაღაცის ძებნა

- ჩემი ცხოვრების წესი.

ვერ მაპატიეს სხვებმა

- ზვინში ვიპოვნე ნემსი.

რამდენჯერ უნდა მოვკდე,

რომ დავიბადო მშვიდი?!

ქვეყანას ჭორი მოვდე,

რომ ვარდს უეკლოდ ვზრდიდი.

მუდამ ვეძახი "ამინ"-ს

მუდამ ვუჩივი ამინდს,

მუდამ ვღალატობ პრინციპს...

და ლამის მჯერა პრინცის!