ნიკო გომელაური - როცა ვირი ხეზე ავა...

ბავშვობიდან მომდევს (რა ვქნა),

მაგრად მიყვარს ტკბილი „ბეზე“.

დამძახოდნენ: მაშინ შეჭამ,

როცა ავა ვირი ხეზე.

როცა მინდა მოვკლა სევდა,

უცრემლებოდ, ჩუმად ვტირი.

მესმის: მაშინ მოგეშვება,

როცა ხეზე ავა ვირი.

თუ გავაბი ქალთან საქმე

და მომანდოს მინდა გავა,

ამბობს: მაშინ მოახერხებ,

როცა ვირი ხეზე ავა.

ნუთუ ღმერთმა მე ამდენი

გაძლება და ჯანი მომცა,

მოვესწრები ნეტავ იმ დღეს,

ვირი ხეზე ავა როცა?