ნიკო გომელაური - სიმართლის არ უყვართ ბრიყვებს...

სიმართლის არ უყვართ ბრიყვებს

არც თქმა და არც გაგება,

ყალბს ამჯობინებენ სიტყვებს

- "ბედისწერა", "განგება"...

მე ვიყვირებ რამეს ისეთს

- ჩუმად მარტო მონა ზის.

ფლიდებს გავუქარწყლებ იმედს,

უსაფუძვლო რომანტიზმს.

ოპტიმიზმის არ მაქვს ხოში,

პესიმიზმსაც ვერ ვიტან,

ყოველდღიურ ლექსიკონში

ახალ ნაკადს შევიტან.

არ მაშინებს - შემხვდეს შარი,

თუ ვარ თვალის ამხელი

მინდა ერქვას ის, რაც არის,

ყველას თავის სახელი.

ნაღდზე ფიქრში ღამეს ვათევ

- არ მოვითხოვ ცხონებას.

ვინმეს მაინც გავუნათებ

ჩემი ლექსით გონებას.