ტარიელ ჭანტურია - მე ვარ მაძიებელი...

მე ვარ მაძიებელი,

ოღონდ - არა შურის! -

მე ვარ მაძიებელი

სიმართლის და პურის!

სიმართლეს და პურს გარდა

უცნაურად მსურის

ერთადერთი - უმანკო

და ლამაზი სული!

მე ვარ მაძიებელი,

ოღონდ - არა შურის!

მე ვარ მაძიებელი

გზების შორზე შორის,

და ხიდებში - ყველაზე

უმოკლესი ხიდის -

გადებულის სიკვდილსა

და სიცოცხლეს შორის!

მე ვარ მაძიებელი,

რა თქმა უნდა, შურის:

მტერი დღესაც ბლომად გვყავს -

რაგინდარა ჯურის!