ტარიელ ჭანტურია - უფლის ფეხსაცმლის ლანჩა...

უფლის ფეხსაცმლის ლანჩა

ახლაც ატყვია ლანდშაფტს!

მიფრინავს იქეთ მტრედი,

მოფრინავს აქეთ ყანჩა.

უსაყვარლესი სახე,

ხან რომ არ ჩანს და ხან ჩანს,

დღეს - გეგონება მტრედი,

ხვალ - გეგონება ყანჩა...

სატანაც ჩნდება ზოგჯერ -

რაგინდ რანაირ სახით! -

სულში უძვრება თვითმკვლელს -

ასასინსა და შაჰიდს...

ათასნაირი ჭორით,

ტყვიით, ტყუილით, მახით...

ჯვარზე გააკრავს მამებს,

შვილებს უხოცავს რახილს...

მაინც ატყვია ლანდშაფტს

უფლის ფეხსაცმლის ლანჩა! -

ჩანს ნაკვალევი უფლის,

თვითონ - რატომღაც არ ჩანს...