ტარიელ ჭანტურია - პარადოქსი გულის თემაზე

იყო და არა იყო რა,

იყო ერთი მწერალი -

ჯანმრთელი-ჯანმრთელი რო,

გული სად ჰქონდა, არ იცოდა.

(კაცმა თქვას, ის კაცი

მწერალი არც იყო,

თუმცა საქართველოში იოლია,

არამწერალი მწერლად გამოაცხადო.

პირიქითაც შეიძლება -

მწერალი გამოაცხადო არამწერლად -

გული დაწყვიტო,

გული ატკინო,

ან სულაც გული გაუხეთქო.

ეს იმ შემთხვევაში მოხდება,

თუ იმ მწერალმა იცის,

გული სადა აქვს...).

მოკლედ, ცხოვრობდა ის ჩვენი არამწერალი მწერალი

ხალისიანად -

გულთან არაფერი მიჰქონდა!

ალბათ იმიტომ, რომ,

უბრალოდ, არ იცოდა,

გული სად ჰქონდა.

გამოხდა ხანი და

მოხდა უცნაური რამ:

არამწერალ მწერალს

სწორედ გულმა უმტყუნა.

მეგობარმა კარდიოლოგებმა ამიხსნეს:

თურმე ჯობს, ადამიანმა იცოდეს,

სადა აქვს გული ,

(რატომ აქვს გული. ვისზე შესტკივა გული.

ვისზე მოსდის გული. ვისთვის უცემს გული და ა.შ.)...