ტარიელ ჭანტურია - ნაფტალინიანი ლექსპრომტი

ხელოვნება - გაღწევის,

ხელოვნება - მიღწევის,

ხელოვნება - დაპყრობის:

გულების და მიწების;

ხელოვნება - დარღვევის -

სიტყვების და ფიცების,

ხელოვნება - ჩაშვების:

დების, ძმების, ბიძების...

ხელოვნება - ღალატის,

ხელოვნება - დასმენის! -

ერთნაირად ყველასი -

რუსისა თუ ნაცმენის.

ხელოვნება მაღალი -

კუბოების დახუფვის,

ოსტატობა - დახვრეტის,

გამწარების, დაღუპვის...

მოაღორებ, ვისაც გსურს -

გურულს. რაჭველს. ხევსურს. სვანს:

დგას, საწყალი, პორტრეტთან

და ღიმილით ხელს უსვამს...

საცოდავი ქვეყანა

ბედს ნამდვილად ეწევა,

მისი უმაღლესობა

თუკი თბილისს ეწვევა...

დაცვას - სათვალიანებს -

ყველას - ვაჟკაცს მოტრეტილს -

მოაქვს მხსნელი მოღვაწის

პენსნიანი პორტრეტი!

კონცერტს დაესწრებიან

მხოლოდ უმაღლესები!

შეგვიქებენ ბრძენ სტუმარს

გრიშაშვილის ლექსები.

მოხერხდება? ვიცოდე,

ამ ყრუ კედლის გარღვევა!

ან ყინულის გულები

ბოლო-ბოლო - გალღვება?

ის წუთი და საათი

მთელ ცხოვრებას გაყვება...

...ჭირს აქედან დანახვა!

მით უმეტეს - გაგება...