ტარიელ ჭანტურია - გზააბნეულო, რას მერჩი, ქარო!..

გზააბნეულო, რას მერჩი, ქარო! -

ხელისბიჭად რომ გაუხდი ქარონს!

რად ებლანდები ფეხებში ყველას -

სად გეჩქარება, მუდამ რომ ჩქარობ!

რა ლამაზი ხარ, იანვრის თოვლო!

ქარივით გინდა, ქვეყანა მოვლო!

სანამ დადნები - ხატებავ თეთრო,

როცა დადნები - ხასხასა მოლო!

...წვიმა და თოვლი... ქარი და ჟინვა...

იქროლოს, რა ვქნა - მე ახლა შინ ვარ...

კარგია ბავშვის ჯანმრთელი ძილი

და გვერდით - ბებრის ბებრული ხვრინვა...