მორის ფოცხიშვილი - დღესვე უნდა გნახო, იცოდე...

დღესვე უნდა გნახო, იცოდე,

უნდა გამიახლო სიცოცხლე,

ახლა მენატრება შენი ხმა,

ახლა უნდა მითხრა ჩემი ხარ.

სულო, სიხარულად მენამე,

რა ვქნა, ახლა მინდა ფრენა მე,

სანთლად ახლა უნდა მიძღვოდე,

ცეცხლში ახლა უნდა ვიწვოდეთ.

...მერე ყველაფერი ნელდება,

მერე ყველაფერი ძნელდება,

ვნება მდუმარებით დუნდება,

გზნება მცხუნვარებით ხუნდება.

...მერე სინანული ვლინდება,

მერე ყველაფერი გწყინდება,

ქრება, იფერფლება ღადარი,

მერე არაფერი არ არი.