მარიამ წიკლაური - კეთილი დანტისტი

- დანტისტი ვარ, მეკბილე!

საკბილეთის დარაჯი!

ვინც შენ კბილებს გიფუჭებს,

ყველას, ყველას მკაცრად ვსჯი!

სულ ადვილად ვმკურნალობ

ჭიან კბილს და კარიესს,

ხან მორყეულ კიჭს ვაძრობ,

ხან ღრმულს ვავსებ ცარიელს.

როგორც ტყეში კოდალა,

ასუფთავებს ჭიან ხეს,

კაკ-კუკ! ჩხაკ-ჩხუკ! - მეც ასე

ყველა ჭიას მივაგნებ!

არ შეშინდე, არ გატკენ,

გირჩევ, როგორ მოიქცე,

კბილებმა რომ გაგიძლოს 

და  მალე არ მოგიცვდეს.

ჩემი ბურღის მანქანით,

ტკივილს ვერც კი გაიგებ,

კარგად დაიმახსოვრე

რასაც დღეს დაგარიგებ:

- თუ იხეხავ ჯაგრისით,

არ აყოლებ ცხელზე ცივს,

ჭამის მერე წყალს ივლებ,

ისუფთავებ ძილის წინ.

თუ არ ყლაპავ კანფეტს და 

სხვა ტკბილეულს მუჭებით,

ვეტყვი კბილებს, ამ კარგ ბავშვს 

ნუღარ გაუფუჭდებით!