მარიამ წიკლაური - მოწყალე ხარ, ბარბარეო

დამიცხობენ ქალასაო,

ტკბილ ნიგვზიან ქადასაო.

ოთხივ კუთხით, ამვლელ-ჩამვლელს 

აუვსებენ კალთასაო.

ბატონები იამებენ

ამისთანა ღალასაო.

წაბრძანებას ინებებენ

საბატონე  ქალაქსაო.

წავლენ, გაიყოლიებენ 

თავქოჩორა მამალსაო.

უკან აღარ მოხედავენ 

საჩვენოსკენ სავალსაო,

ველს გადავლენ, ყვავილოვანს,

ავლენ მთასა მაღალსაო,

ბარბარესთან წაიღებენ

ჩვენი მადლის ამბავსაო.

მოწყალე ხარ, ბარბარეო,

გამიხსენე მალ-მალეო,

ავისა და ბოროტისგან

შენ კალთისქვეშ დამმალეო.