მარიამ წიკლაური - თურმე

თურმე მწვანე კალიას

მეზობლების ვალი აქვს.

- რა ისესხა?

- ჩალის ღერი!

- რათ უნდოდა?

- საპატარძლოს სთხოვა ხელი!

- რა უყიდა?

- კალოში და გრძელი კაბა!

- კიდევ, კიდევ?

- ზამთრისათვის ეძებს საბანს.

- კიდევ, კიდევ?

- სახლს აშენებს ალიზით,

სიმღერით და ხალისით.

გააკეთებს ბუხარსაც, 

ხარს იყიდის, გუთანსაც.

აშენდება კალია, 

გამრჯე არის ძალიან.

დღეს არა და ხვალ,

გაისტუმრებს ვალს.

პატარძალიც ბზრიალებს,

სახლ-კარს დააწკრიალებს,

მალე ხეებს დარგავს, 

გამოაცხობს ქადას,

ქმარს მოუქსოვს წინდებს,

შვილს უყიდის წიგნებს.