მარიამ წიკლაური - პატარძალი

მარტო ნემსი რას იზამდა?

ნემსს უშველა ძაფმა.

თერძმა ჭრა და კერა ცხრა დღე 

ჭიჭნაურის კაბა.

მარტო კაბა რას იზამდა?

ხარაზს სთხოვეს ქოში.

ქოშს ბაფთებიც მიუმატეს.

ღირდა ორი გროში.

გამოაწყვეს პატარძალი 

ზუსტად დათქმულ დროში.

ნეფეც მოდგა სახლის კართან

დაფდაფით და დროშით,

მარტო დროშა რას იზამდა?

მოაგორეს ეტლი.

ჩააბრძანეს დედოფალი,

მეტს ვერაფერს გეტყვი.