გივი გელაშვილი - ო, წლებო, წლებო...

ო, წლებო, წლებო, ოცნების წლებო,

საით გაფრინდით, სად გაქრით, ბედად?!

მომტაცეთ ურჩი ახალგაზრდობა

და დამიტოვეთ ფიქრი და სევდა.

მომტაცეთ ქვეყნად ყველა იმედი,

მღელვარე გულიც თქვენს სრბოლას გაჰყვა,

თავდავიწყებით რომ ვაჭენებდი,

აღარ მყავს რაში, მაშინ რომ მყავდა...

აღარ მყავს, არა, მფრინავი რაში,

ცეცხლოვან ფრთებით ღრუბლებს რომ კვეთდა,

ფაფარაშლილი თოვლსა და ქარში,

ჭიხვინ-ჭიხვინით ბედს რომ დასდევდა.

ჰეი, სად არის შემდგარი ყალყზე,

ჩემი მერანი - მთებზე მფრინავი?

რომ ძველებურად მოვევლო ზურგზე

და გავაქროლო, როგორც ნიავი!