ლაშა ნადარეიშვილი - დედამიწაზე ფეხი რომ დადგი...

დედამიწაზე ფეხი რომ დადგი,

უკვე ვალი გაქვს მისი...

ვალის გადახდას - სიცოცხლე რაა?!

არ ეყოფოდა ისიც!

მიწა დუმს, ხან კი ცეცხლად იფეთქებს,

მარტო ტკივილი რად ღირს -

მის მკერდზე, როგორც თავის მამულში

ადამიანი დადის!

ყველა სანთელი ზეცაში გარბის,

მაინც მიწაში წვება

და ენაცვლება ერთიმეორეს

მოვალეების წყება.

ისევ ბობოქრობს დაღლილი მკერდი,

რაღაც უნდოდა ეთქვა -

ჭედავს ახალი სიცოცხლის აკვანს

მიწის ბოღმა და ფეთქვა.

დედამიწაზე ფეხი რომ დადგი,

უკვე ვალი გაქვს მისი....

ვალის გადახდას - სიცოცხლე რაა?!

არ ეყოფოდა ისიც.