აკაკი წერეთელი - სახალხო შაირი

მამა უცხონდა სკვითორელს,

თავი კი მივსცე ხელადა!

თავის ოჯახში ბრიყვია,

სხვისაში შედის ხელადა;

ხან იღრინება ძაღლივით,

ხან იპარება მელადა;

სხვებს "მაცა, მაცას" უძახის,

დიდად ყროყინებს ველადა;

აღარც კაცია, არც მხეცი,

გამხდარა საეჭველადა;

ქვეყნის ცოდვა და ვარამი

გარს შემორტყმია მცველადა.

არ იხსენება ახლებში,

არც ვარგებულა ძველადა,

ღმერთო! შენ გაასამართლე,

შენ გიხმობთ დამფარველადა!